როგორც ზიგმუნდ ფროიდი ამბობდა, ადამიანის გონება აისბერგივითაა, რომლის ზედა ნაწილი ცნობიერია , ხოლო ის, რაც წყლის ქვემოთაა, ეს უკვე ქვეცნობიერია. ამიტომ დიდი მნიშვნელობა აქვს იცოდეთ, თუ როგორ ვიმოქმედოთ მომხმარებელზე ქვეცნობიერად.

არის რამდენიმე ფაქტორი, რომელიც მოქმედებს ადამიანის ქცევასა და ფსიქოლოგიაზე, როგორც ცნობიერად, ასევე ქვეცნობიერად. მაგალითად, რაც უფრო მეტ დროს ატარებს ადამიანი ერთ ადგილას, მით უფრო იზრდება იმის შანსი რომ მეტი პროდუქტი შეიძინოს. კვლევამ აჩვენა, რომ მომხმარებელი, რომელიც 40 წუთს ატარებს მაღაზიაში, 2–ჯერ მეტ პროდუქტს ყიდულობს, ვიდრე ის ადამიანი, რომელიც მხოლოდ 10 წუთი ჩერდება იმავე მაღაზიაში. ამიტომ ყველაზე დიდი მნიშვნელობა ასეთ შემთხვევაში აქვს, რაც შეიძლება სასიამოვნო გარემო შეუქმნათ თქვენს მომხმარებელს. ამის გამო ტანსაცმლის მაღაზიებში ხშირად მოისმენთ სასიამოვნო, მშვიდ მუსიკას, რომელიც გიბიძგებს დიდხანს დარჩე და დაათვალიერო პროდუქტი.

თუმცა, უნდა აღინიშნოს, რომ შედარებით განსხვავებული სიტუაციაა რესტორნებსა და სხვა კვების ობიექტებში, სადაც ცდილობენ უფრო სწრაფი ტემპის მუსიკა იყოს ჩართული. ეს ქვეცნობიერად განაპირობებს მომხმარებლის სისწრაფეს და შესაბამისად მაგიდებიც უფრო სწრაფად თავისუფლდება, რაც მათთვის დატვირთულ პერიოდში საკმაოდ მომგებიანია. ასევე აუცილებელია, სწორად განსაზღვროთ სეგმენტი. თუ მაღაზია გათვლილია ახალგაზრდებზე, უმჯობესია მუსიკა მაღალ ხმაზე იყოს, ხოლო 50 წლის ზემოთ მომხმარებელი თავს უფრო მშვიდ გარემოში გრძნობს კომფორტულად.

ასევე არსებობენ იმპულსური, რაციონალური და ტრადიციული მყიდველები. იმპულსური მყიდველი არის ინდივიდი, რომელიც დაუგეგმავად, იმპულსურად და იმ მომენტში არსებულ ემოციებზე დაყრდნობით იღებს გადაწყვეტილებას. სწორედ მათთვისაა განკუთვნილი სალარო აპარატებთან განლაგებული ისეთი პროდუქტი, როგორებიცაა: საღეჭი რეზინა, შოკოლადი, სიგარეტი და ა.შ. ასეთი მომხმარებლები უპირატესობას ანიჭებენ წითელ, შავ და სტაფილოსფერ ფერებს.

რაციონალური მყიდველი უფრო მეტად ეძიება პროდუქტს. მისთვის მთავარია დარწმუნდეს, რომ სწორ გადაწყვეტილებას იღებს, ამისთვის შეუძლია ერთი და იმავე მაღაზიაში რამდენჯერმე მივიდეს. კომპანიებისთვის აუცილებელია როგორც ემოციური, ასევე რაციონალური მომხმარებელი, რადგან ემოციური ხშირად ყიდულობს, ხოლო რაციონალური იშვიათად, მაგრამ ბევრს. ასეთი მომხმარებელი უფრო მეტად უპირატესობას ანიჭებს მუქ ლურჯ და ცისფერ ფერებს.

რაც შეეხება ტრადიციული მყიდველს, ეს არის ინდივიდი, რომელიც რთულად ეგუება, ეწინააღმდეგება სიახლეებს. ასეთი ადამიანებისთვის მთავარია იცოდნენ, ვინ იყენებს ამ პროდუქტს. ამიტომ უკეთესია დაასწროთ და კითხვების დასმამდე დაიწყოთ ამ თემაზე საუბარი. ასეთი ადამიანისთვის სანდო კომპანიების პარტნიორობა, თქვენს სადოობაზე მეტყველებს. ტრადიციული მყიდველები ძირითადად ვარდისფერ და ღია ცისფერ ფერებს ანიჭებენ უპირატესობას.

მომხმარებლის ქცევის შესწავლა მარკეტინგის კონცეფციაშია გაერთიანებული. ეს არის დისციპლინა, რომელიც შეისწავლის თუ რატომ, როგორ, სად და როდის ხარჯავენ ინდივიდები დროს, ფულსა და ძალისხმევას. ამ ყველაფერზე დაკვირვება, შესწავლა და ანალიზი ეხმარებათ მარკეტოლოგებს უკეთ გაიგონ მომხმარებლის საჭიროებები, პრიორიტეტები და ამ პიროვნული მახასიათებლების გათვალისწინებით, უფრო ეფექტურად დაგეგმონ მარკეტინგული სტრატეგიები.